Monday, June 3, 2013

Sa Tetap Tunggu Kenyataan

Pagi ini....Sa coba paksakan pena bicara
Tentang apa yang skarang sa rasa
Sa paksakan tinta untuk mengukir huruf
Biar tra seindah ukiran Asmat
Yang penting dong dua bisa
Coba gambarkan rasa yang ada dalam sa pu jiiwa

Sungguh mati !!!!
Sa tra ingin angin lalu  saling sapa di dunia maya
Yang sa inginkan cuma kenyataan polo sa pu badan
Yang sa mau cuma kenyataan yang bikin tenang sa pu jiwa

Sayang seribu sayang...
Macam keinginan ini tinggal keinginan saja kaaaaa
Sa tra bisa menyangkal
Kadang-kadang ada hadir rasa bimbang
Walau sa coba percaya diri

Dalam keadaan bimbang dan ragu
Dalam sa pu kesendirian
Sayup-sayup sa dengar Kk pu suara...
"Ade sayang.....sabar,sabar dan sabar
Waktu itu pasti akan tiba
Kitong pasti akan jumpa
Bukan lagi lewat telp atau FB
Bukan lagi lewat media elektronik,Ade
Tapi perjumpaan yang nyata
Percaya selalu bahwa Kk selalu cinta Ade.."

Di sini sa selalu menunggu waktu itu
Di sini sa selalu berharap dan berdoa
Di sini sa selalu tabah biarpun sebenarnya terlalu berat

Kadang kala sa lewati hari-hari dengan air mata
Karena sa rasa kesepian walau di sana sini rame
Kadang memang sa menangis walau trada air mata menetes
Karena sa rasa sa pu jiwa merana
Walau segala-galanya ada
Sa rindu Kk dan sa pu sodara dorang semua
Sa rindu sa pu TANAH dan BANGSA

Dalam kerinduan ini
Hanya ada satu tekad
Yang selalu bikin sa nekat
Sa tetap akan bertahan
Sa tetap akan setia
Sa tra akan tergoda sedikitpun
Biarpun ada 1001 manisnya rayuan dunia barat

Yaaaa.....
Sa harus mampu
Sebab yang sa tunggu cuma 1
Yakni tibanya waktu itu
Waktu di mana bayangan ini jadi kenyataan

Hari ini sa mo kastau bahwa
"Sa tetap tunggu kenyataan itu,Kk."


Venlo
Akhir April 2013
Di samping sa pu jendela kamar
Awali pagi yang indah di Musim Semi.

Catatan : Sandaun-Mixim-Westpa

Artikel Terkait